പ്രായപൂർത്തിയാകാത്ത ഹാഫിളായ കുട്ടി ഇമാമായി നിൽക്കുന്ന തറാവീഹ് നിസ്കാരം ഞങ്ങളുടെ നാട്ടിൽ ഉണ്ട്. അതിൽ പങ്കെടുക്കുന്നതിന്റെ വിധി എന്താണ് ?

 

പലകാരണങ്ങളാൽ അത് കുറ്റകരമായ കറാഹത്താണ്. പ്രായപൂർത്തിയാകാത്ത കുട്ടി ഇമാമായി നിസ്കരിക്കുന്നത് അനുവദനീയമല്ല, ലെെംഗിക ചുവയുള്ള നോട്ടം, സംസാരം തുടങ്ങിയ തെറ്റുകളും കുഴപ്പങ്ങളും വ്യാപിച്ച ഇക്കാലത്ത് സ്തീകൾ ജമാഅത്ത് നിസ്കാരത്തിനായി അവരുടെ വീടുകളിൽ നിന്ന് പുറത്ത് പോകൽ കറാഹത്താണ്, സ്ത്രീകൾക്ക് ജമാഅത്ത് നിസ്കാരം കൊണ്ട് കല്പന ഇല്ല എന്നിവയാണ് പ്രസ്തുത കാരണങ്ങൾ. 

"പ്രായപൂർത്തിയായവർക്ക് കുട്ടികളെ ഇമാമാക്കി തുടർന്ന് നിസ്കരിക്കൽ അനുവദനീയമല്ല. ബലഖ് നാട്ടിലെ പണ്ഡിതന്മാർ തറാവീഹിലും മറ്റ് സുന്നത്ത് നിസ്കാരങ്ങളിലും കുട്ടികളെ ഇമാമാക്കി നിസ്കരിക്കൽ അനുവദനീയമാണെന്ന് പറഞ്ഞിട്ടുണ്ടെങ്കിലും ഒരു നിസ്കാരത്തിലും ഇത് പാടില്ല എന്നതാണ് പ്രബലമായ അഭിപ്രായം". (അൽ ഇനായഃ ശറഹുൽ ഹിദായഃ 2/73). 

"ഈ കാലഘട്ടത്തിൽ ലെെംഗിക കുറ്റകൃത്യങ്ങൾ വ്യാപിച്ചതിനാൽ പ്രായ ഭേദമന്യേ സ്ത്രീകൾ ഏതെങ്കിലും നിസ്കാരത്തിന്റെ ജമാഅത്തിൽ സംബന്ധിക്കാൻ പോകുന്നത് കുറ്റകരമായ കറാഹത്താണ്"(അല്ലുബാബ് 1/40). "സ്ത്രീകൾ മാത്രം ജമാഅത്തായി നിസ്കരിക്കുന്നത് കുറ്റകരമായ കറാഹത്താണ്". (അല്ലുബാബ് പേ:34).