കടക്കാരന്റെ നേർച്ച

 

കടം ഉള്ളയാൾ ഉദ്ദേശപൂർത്തീകരണത്തിനും മറ്റു വല്ല ആവശ്യങ്ങൾക്കുമായി സദഖ നേർച്ചയാക്കുന്നതും മഹാന്മാരുടെ പേരിൽ നേർച്ചയാക്കി ദാനം ചെയ്യുന്നതും അനുവദനീയമാണോ?

കടബാധ്യതയുള്ളയാൾ തന്റെ കടം വീട്ടാൻ മറ്റൊരു മാർഗ്ഗം കാണാതെ അതിലേക്കാവശ്യമായ ധനം ദാനം ചെയ്യലും സ്വദഖ ചെയ്യലും ഹറാമാണ്. എങ്കിലും അയാൾ സ്വദഖ ചെയ്യാൻ നേർച്ചയാക്കിയാലും അത് വീട്ടിയാലും അതെല്ലാം സാധുവാകുന്നതാണ്. എന്തുകൊണ്ടെന്നാൽ, കടമുള്ളയാൾ അതിനാവശ്യമായ ധനം സ്വദഖ ചെയ്യൽ ഹറാമാകുന്നത് തനിക്ക് കടം നല്കിയയാളെ വിഷമിപ്പിക്കലുണ്ടെന്ന കാരണം കൊണ്ടാണ്. അതേസമയം, താൻ നേർച്ചയാക്കിയതും ആ നേർച്ച നിറവേറ്റിക്കൊണ്ട് ദാനം ചെയ്തതുമായ ധനത്തോടു തന്നെ അയാളുടെ കടബാധ്യത ബന്ധപ്പെടുന്നില്ല. അതിനാൽ ആ ധനത്തെ അയാൾ മറ്റു മാർഗ്ഗത്തിൽ ചെലവഴിക്കുന്നത് അസാധുവാണെന്നു പറയാനും വയ്യ. തന്റെ ഉത്തരവാദിത്തത്തിലുള്ള കടബാധ്യത വീട്ടാത്ത കുറ്റം അയാൾക്കുണ്ടാകുന്നത് ഈ ധനത്തിന്റെ തടിയുമായി ബന്ധപ്പെടുന്ന പ്രശ്നമല്ല. തുഹ്ഫ : 10-78.