ഓഡിയോ ക്ലിപ്പുകൾ
ശഅ്ബാൻ പതിനഞ്ചിന് പ്രത്യേകം നോമ്പ് സുന്നത്തുണ്ടോ?അതായത് , അയ്യാമുൽ ബീളിൻ്റെ നോമ്പ് എന്ന നിലയ്ക്കോ ശഅ്ബാൻ മുഴുവനും നോമ്പ് സുന്നത്തുണ്ടെന്ന നിലയ്ക്കോ അല്ല. ബറാഅത്തിൻ്റെ ദിനം എന്ന നോമ്പാണ് ചോദിക്കുന്നത്.ബറാഅത്ത് നോമ്പ് എന്ന നിലയ്ക്ക് നോമ്പ് സുന്നത്തില്ലന്നു കണ്ണിയത്ത് ഉസ്താദ് ഫത് വ നൽകിയിട്ടുണ്ടോ? മറുപടി പ്രതീക്ഷിക്കുന്നു?
ശഅ്ബാൻ പതിനഞ്ച് എന്ന നിലയ്ക്ക് തന്നെ നോമ്പ് സുന്നത്തുണ്ട്. ഇക്കാര്യം നമ്മുടെ ഫുഖഹാഅ് തെളിവ് സഹിതം വിവരിച്ചിട്ടുണ്ട്.
ഇമാം ശിഹാബുദ്ദീൻ റംലി (റ)വിൻ്റെ വീക്ഷണം :-ഖാതിമത്തുൽ മുഹഖ്ഖീൻ ഇമാം ഇബ്നു ഹജർ ഹൈതമി(റ)വിൻ്റെ ഗുരുനാഥനും ഇമാം മുഹമ്മദ് റംലി (റ)വിൻ്റെ പിതാവുമായ ഇമാം ശിഹാബുദ്ദീൻ റംലി (റ) വിനോട് ഇവ്വിഷയത്തിൽ ചോദിക്കപ്പെട്ടത് ഇങ്ങനെ:
ﺳﺌﻞ) ﻋﻦ ﺻﻮﻡ ﻣﻨﺘﺼﻒ ﺷﻌﺒﺎﻥ ﻛﻤﺎ ﺭﻭاﻩ اﺑﻦ ﻣﺎﺟﻪ ﻋﻦ اﻟﻨﺒﻲ - ﺻﻠﻰ اﻟﻠﻪ ﻋﻠﻴﻪ ﻭﺳﻠﻢ - ﺃﻧﻪ ﻗﺎﻝ «ﺇﺫا ﻛﺎﻧﺖ ﻟﻴﻠﺔ اﻟﻨﺼﻒ ﻣﻦ ﺷﻌﺒﺎﻥ ﻓﻘﻮﻣﻮا ﻟﻴﻠﻬﺎ ﻭﺻﻮﻣﻮا ﻧﻬﺎﺭﻫﺎ» ﻫﻞ ﻫﻮ ﻣﺴﺘﺤﺐ ﺃﻭ ﻻ ﻭﻫﻞ اﻟﺤﺪﻳﺚ ﺻﺤﻴﺢ ﺃﻭ ﻻ ﻭﺇﻥ ﻛﺎﻥ ﺿﻌﻴﻔﺎ ﻓﻤﻦ ﺿﻌﻔﻪ
ശഅ്ബാൻ പതിനഞ്ചിൻ്റെ നോമ്പിനെ കുറിച്ച് ഇമാം ശിഹാബുദ്ദീൻ റംലി (റ) വിനോട് ചോദിക്കപ്പെട്ടു. ആ നോമ്പ് സുന്നത്തുണ്ടാ ഇല്ലയോ? ശഅ്ബാൻ പതിനഞ്ചിൻ്റെ രാവായാൽ ആ രാത്രി നിസ്കരിക്കുകയും അതിൻ്റെ പകലിൽ നോമ്പനുഷ്ഠിക്കുകയും ചെയ്യുകയെന്ന ഇബ്നു മാജ:(റ) നബി(സ്വ)യിൽ നിന്നു റിപ്പോർട്ടു ചെയ്ത ഹദീസ് സ്വഹീഹ് ആണോ അല്ലയോ? ളഈഫ് ആണെങ്കിൽ ആരാണു ളഈഫാക്കിയത്?
ഈ ചോദ്യങ്ങൾക്കുള്ള മറുപടി ഇമാം ശിഹാബുദ്ദീൻ റംലി (റ) നൽകുന്നത് ഇങ്ങനെ:
(ﻓﺄﺟﺎﺏ) ﺑﺄﻧﻪ ﻳﺴﻦ ﺻﻮﻡ ﻧﺼﻒ ﺷﻌﺒﺎﻥ ﺑﻞ ﻳﺴﻦ ﺻﻮﻡ ﺛﺎﻟﺚ ﻋﺸﺮﻩ ﻭﺭاﺑﻊ ﻋﺸﺮﻩ ﻭﺧﺎﻣﺲ ﻋﺸﺮﻩ ﻭاﻟﺤﺪﻳﺚ اﻟﻤﺬﻛﻮﺭ ﻳﺤﺘﺞ ﺑﻪ
(فتاوى الرملي: ٧٩ / ٢)
ശഅ്ബാൻ പതിനഞ്ചിന് നോമ്പ് സുന്നത്തുണ്ട്. മാത്രമല്ല , ശഅ്ബാൻ 13 , 14 , 15 ദിവസങ്ങളിൽ നോമ്പ് സുന്നത്തുണ്ട് .
ശഅ്ബാൻ പതിനഞ്ചിൻ്റെ രാവിൽ നിസ്കരിക്കുക , പകലിൽ നോമ്പ് അനുഷ്ഠിക്കുക എന്ന ഹദീസ് ലക്ഷ്യമായി സ്വീകരിക്കാൻ പറ്റുന്നതാണ് .(ഫതാവാ റംലി: 2/79)
ശഅ്ബാൻ പതിനഞ്ച് എന്ന നിലയ്ക്കു തന്നെ നോമ്പ് സുന്നത്തുണ്ടെന്ന വസ്തുത വളരെ വ്യക്തമായി ഇമാം ശിഹാബുദ്ദീൻ റംലി (റ) വിവരിച്ചുതന്നു.
വെള്ളിയാഴ്ച മാത്രം സുന്നത്ത് നോമ്പ് പിടിക്കൽ കറാഹത്താണ് . എന്ന മസ്അല തുഹ്ഫ: വിവരിക്കുന്നിടത്ത് ഇമാം ശർവാനി (റ) വിവരിക്കുന്നത് ഇങ്ങനെ:
ﻭﻛﺬا ﺇﺫا ﻭاﻓﻖ ﻳﻮﻣﺎ ﻃﻠﺐ ﺻﻮﻣﻪ ﻓﻲ ﻧﻔﺴﻪ ﻛﻌﺎﺷﻮﺭاء ﺃﻭ ﻋﺮﻓﺔ ﻭﻧﺼﻒ ﺷﻌﺒﺎﻥ
വെള്ളിയാഴ്ച ദിവസം നോമ്പ് സുന്നത്തുള്ള ദിവസമായാൽ വെള്ളിയാഴ്ച മാത്രം നോമ്പ് പിടിക്കൽ കറാഹത്തില്ല. മുഹർറം പത്ത് , ദുൽഹിജ്ജ :ഒമ്പത് , ശഅ്ബാൻ പതിനഞ്ച് എന്നിവയിലെ നോമ്പ് പോലെ. (ശർവാനി: 3/458)
ഇമാം ഇബ്നു ഖാസിം(റ)വും ശഅ്ബാൻ പതിനഞ്ചിൻ്റെ നോമ്പ് പോലെ എന്നു ഈ ചർച്ചയിൽ പറഞ്ഞിട്ടുണ്ട്.തുടർന്നു മഹാൻ പറയുന്നു: അപ്പോൾ കറാഹത്തില്ലന്നു മാത്രമല്ല , നോമ്പ് പിടിക്കൽ സുന്നത്താണ്. (ഇബ്നു ഖാസിം :3/458)
അയ്യാമുൽ ബീളിൽ പെട്ട നോമ്പ് എന്ന നിലയ്ക്കല്ലാതെ ശഅ്ബാൻ പതിനഞ്ച് (ബറാഅത്ത് നോമ്പ് ) എന്ന നിലയ്ക്ക് നോമ്പ് സുന്നത്തുണ്ടെന്ന് പ്രസ്താവിച്ച പണ്ഡിതരാണ്
ഇമാം ശിഹാബുദ്ദീൻ റംലി (റ),ഇമാം ഇബ്നു ഖാസിം(റ), ഇമാം ശർവാനി (റ) എന്നിവർ .
ഇബ്നു ഖാസിം(റ) വിൻ്റെ ഇബാറത്ത്:
ﻳﻨﺒﻐﻲ ﺃﻥ ﻣﺜﻞ ﻣﻮاﻓﻘﺔ اﻟﻌﺎﺩﺓ ﻭﻣﺎ ﺫﻛﺮﻭﻩ ﻣﻌﻬﺎ ﻣﺎ ﺇﺫا ﻃﻠﺐ ﺻﻮﻣﻪ ﻓﻲ ﻧﻔﺴﻪ ﻛﻴﻮﻡ اﻝﻧﺼﻒ ﻣﻦ ﺷﻌﺒﺎﻥ ﻓﺈﺫا ﻭاﻓﻖ ﻳﻮﻡ ﺟﻤﻌﺔ ﻳﻨﺒﻐﻲ ﺃﻥ ﻻ ﻳﻜﺮﻩ ﺑﻞ ﻳﻄﻠﺐ ﻭﻳﺨﺼﺺ اﻟﻨﻬﻲ ﻋﻦ ﺻﻮﻡ اﻟﺠﻤﻌﺔ ﺑﺎﻷﻣﺮ ﺑﺼﻮﻡ ﻳﻮﻡ اﻟﻨﺼﻒ ( حاشية ابن قاسم :٣ / ٤٥٨)
ഇമാം ഇബ്നു ഹജർ(റ)വിൻ്റെ വീക്ഷണം
ശഅ്ബാൻ പതിനഞ്ചിൻ്റെ നോമ്പ് അയ്യാമുൽ ബീളിൽ പെട്ടുയെന്ന നിലയ്ക്കാണ് സുന്നത്ത് ശഅ്ബാൻ പതിനഞ്ച് എന്ന പ്രത്യേക നോമ്പ് എന്ന നിലയ്ക്കല്ല .ഇബ്നുമാജ:(റ) റിപ്പോർട്ട് ചെയ്ത ഹദീസ് ളഈഫാണ്. (ഫതാവൽ കുബ്റാ : 2/80)
ﻭﺃﻣﺎ ﺻﻮﻡ ﻳﻮﻣﻬﺎ ﻓﻬﻮ ﺳﻨﺔ ﻣﻦ ﺣﻴﺚ ﻛﻮﻧﻪ ﻣﻦ ﺟﻤﻠﺔ اﻷﻳﺎﻡ اﻟﺒﻴﺾ ﻻ ﻣﻦ ﺣﻴﺚ ﺧﺼﻮﺻﻪ ﻭاﻟﺤﺪﻳﺚ اﻟﻤﺬﻛﻮﺭ ﻋﻦ اﺑﻦ ﻣﺎﺟﻪ ﺿﻌﻴﻒ
(الفتاوى الكبرى : ٢ / ٨٠)
ഇമാം ഇബ്നു ഹജർ(റ) അയ്യാമുൽ ബീളിലെ നോമ്പ് എന്ന നിലയ്ക്കാണ് ശഅ്ബാൻ പതിനഞ്ചിൻ്റെ നോമ്പ് സുന്നത്തന്ന് പറയുമ്പോൾ അദ്ദേഹത്തിൻ്റെ ഗുരുനാഥൻ ഇമാം ശിഹാബുദ്ദീൻ റംലി (റ) ശഅ്ബാൻ പതിനഞ്ച് എന്ന നിലയ്ക്ക് തന്നെ നോമ്പ് സുന്നത്താണെന്നു വിവരിച്ചുതന്നു.
ഈ വീക്ഷണപ്രകാരമണ് നമ്മുടെ നാട്ടിലെ അമൽ.രണ്ടു വീക്ഷണവും ആധികാരികം തന്നെ.
ഖാതിമത്തുൽ മുഹഖ്ഖീൻ ഇമാം ഇബ്നു ഹജർ(റ)വിൻ്റെ വീക്ഷണമനുസരിച്ച് റഈസുൽ മുഹഖ് ഖീൻ കണ്ണിയത്ത് ഉസ്താദ് (نور الله مرقده) ഫത് വ നൽകിയിട്ടുണ്ട്.
ദുആ വസ്വിയ്യത്തോടെ
എം.എ.ജലീൽ സഖാഫി പുല്ലാര
