മനുഷ്യരല്ലാത്ത അനേകം കോടി ജീവ ജാലങ്ങൾ ഈ ഭൂലോകത്തുണ്ട്. എന്നാൽ അവയൊന്നും തന്നെ ഒരു പ്രത്യേക മത-ദർശനം പിൻപറ്റുന്നതായി നമ്മൾ കാണുന്നില്ല. പിന്നെ മനുഷ്യർക്ക് മാത്രം എന്തിനാണീ മതങ്ങൾ?
മനുഷ്യരല്ലാത്ത ജീവികൾക്കൊക്കെ അവയുടെ പ്രകൃതി/സ്വഭാവം അവരുടെ ജനിതക കോഡുകളിൽ തന്നെ രേഖപ്പെടുത്തപ്പെട്ടിട്ടുണ്ട്. ഈ ജീവികളൊന്നും തന്നെ ഒരു സ്കൂളിലോ കോളേജിലോ പോകുന്നതായി നമ്മൾ കാണുന്നില്ല. അവർക്കു മാർഗ നിർദേശങ്ങൾ നൽകാനോ ഏതെങ്കിലും വിഷയത്തിൽ Training നൽകാനോ ആരെയും നമ്മൾ കാണുന്നുമില്ല. അവയൊക്കെത്തന്നെ അവയുടെ ജന്മ വാസനകളുടെ അടിസ്ഥാനത്തിൽ മുന്നോട്ടു പോയിക്കൊണ്ടിരുന്നു.
എന്നാൽ മനുഷ്യർ അങ്ങനെയല്ല; മറ്റു ജീവികളെ അപേക്ഷിച്ചു വിവേചന ബുദ്ധിയും തിരഞ്ഞെടുക്കാനുള്ള സ്വാതന്ത്ര്യവും നൽകപ്പെട്ട ഭൂമിയിൽ കാണാവുന്ന ഏക ജീവിയാണ് മനുഷ്യൻ. എന്നാൽ മറ്റു ജീവികളിൽ നിന്ന് വ്യത്യസ്തമായി നന്മയെന്ത്, തിന്മയെന്ത് എന്ന് ജന്മനാ അറിയാനുള്ള കഴിവ് മനുഷ്യർക്കില്ല. അതുകൊണ്ടു തന്നെ തീർച്ചയായും നന്മ-തിന്മകൾ അവൻ പഠിപ്പിക്കപ്പെടണം.
മനുഷ്യരല്ലാത്ത മറ്റു ജീവികൾക്കിടയിലൊന്നും തന്നെ യാതൊരു വിധ നിയമങ്ങളോ നിയമ പാലകരെയോ കോടതികളോ ഒന്നും നമ്മൾ കാണുന്നില്ല. എന്നിട്ടും ഒരു സാമൂഹിക പ്രശ്നവും കൂടാതെ അവയൊക്കെ ശാന്തമായി ജീവിക്കുന്നത് നാം കാണുന്നു.
എന്നാൽ ഈ ലോകത്തു മനുഷ്യന് സ്വസ്ഥമായ ഒരു സാമൂഹിക ജീവിതം നയിക്കണമെങ്കിൽ തീർച്ചയായും ചില നിയമങ്ങൾ കൂടിയേ തീരൂ. ഓരോരുത്തരും അവരവർക്കു ശരിയെന്നു തോന്നുന്നത് ചെയ്യാൻ തുടങ്ങിയാൽ ഈ ലോകത്തു ജീവിതം തന്നെ ദുസ്സഹമാകും എന്ന് ചിന്തിക്കുന്ന പക്ഷം നമുക്ക് മനസ്സിലാകും. ചില ആളുകൾക്ക് ശരിയെന്നു തോന്നുന്നത് മറ്റൊരാൾക്ക് തെറ്റാണെന്നു വാദിക്കാം എന്നതത്രേ സത്യം.
അപ്പോൾ പിന്നെ ഈ മാർഗ ദർശനവും നിയമങ്ങളും ആര് നൽകും? നമ്മെയെല്ലാം സൃഷ്ടിച്ചു പരിപാലിക്കുന്ന ദൈവം തമ്പുരാൻ തന്നെ ആവണം നമുക്കുള്ള നിയമങ്ങളും നൽകേണ്ടത് എന്നാണു ഇസ്‌ലാം പഠിപ്പിക്കുന്നത്. ആ സംവിധാനത്തിന് നമ്മൾ നൽകിയ പേര് മാത്രമാണ് മതങ്ങൾ.
No comments:
Post a Comment