പുരുഷന്മാർ താടി വടിക്കുന്നതിൻ്റെ ഇസ്'ലാമിക വിധി

 

താടി വടിക്കൽ കറാഹത്താണ്. ഇമാം റാഫിഈ (റ), ഇമാം നവവി(റ) എന്നിവർ ഇക്കാര്യം പറഞ്ഞിട്ടുണ്ട്. ഇതാണു ശാഫിഈ മദ്ഹബിലെ പ്രബല വീക്ഷണം . ( നിഹായ : 8/ 21 , ശർവാനി: 9/376)

`قال الشيخان يكره حلق اللحية` [ حاشية الشرواني : ٩ / ٣٧٦ ]

ഹറാം എന്നൊരു വീക്ഷണമുണ്ട്. അതു മദ്ഹബിൽ പ്രബലമല്ല_

ഉപേക്ഷിച്ചാൽ പ്രതിഫലം ഉള്ളതും പ്രവർത്തിച്ചാൽ ശിക്ഷയില്ലാത്തതുമാണ് കറാഹത്ത്.

`الكراهة ما يثاب على تركه ولا يعاقب على فعله`

ഫത്ഹുൽ മുഈൽ

ഫത്ഹുൽ മുഈനിൽ '' താടി വടിക്കൽ ഹറാമാകും''

`يحرم حلق اللحية`

എന്നു പറഞ്ഞതിനെ കുറിച്ച് തർശീഹ് പറയുന്നത് ഇങ്ങനെ: 

وعلى الكراهة جرى اﻟﻐﺰاﻟﻲ ﻭﺷﻴﺦ اﻹﺳﻼﻡ ﻭاﺑﻦ ﺣﺠﺮ ﻓﻲ اﻟﺘﺤﻔﺔ ﻭاﻟﺮﻣﻠﻲ ﻭاﻟﺨﻄﻴﺐ ﻭﻏﻴﺮﻫﻢ فما جرى عليه الشارح خلاف المعتمد ( ترشيح : ٢٠٧ )

താടി വടിക്കൽ ഹറാമാണെന്ന് ശൈഖ് മഖ്ദൂം (റ) പറഞ്ഞത് പ്രബല വീക്ഷണത്തിന് എതിരാണ്. ഇമാം ഇബ്നു ഹജർ(റ) തുഹ്ഫ: യിലും ഇമാം ഗസാലി (റ)വും ശൈഖുൽ ഇസ്'ലാം സകരിയ്യൽ അൻസ്വാരി (റ)വും ഇമാം റംലി (റ)വും ഇമാം ഖത്വീബുശ്ശിർബീനി (റ)വും മറ്റു പലരും താടി വടിക്കൽ കറാഹത്താണ് എന്നു വ്യക്തമാക്കിയിട്ടുണ്ട് ( തർശീഹ്: പേജ്: 207)

ഇക്കാര്യം ഇആനത്തിലും പറഞ്ഞിട്ടുണ്ട് (2/386)

സയ്യിദുൽ ബക്'രി (റ) വിവരിക്കുന്നു: ശൈഖ് മഖ്ദൂം (റ) താടി വടിക്കൽ ഹറാം എന്നു പറഞ്ഞത് ദുർബല വീക്ഷണമാണ്. അദ്ദേഹം അങ്ങനെ പറഞ്ഞത് തൻ്റെ ഗുരു ഇമാം ഇബ്നു ഹജർ(റ) ശർഹുൽ ഉബാബിൽ പറഞ്ഞത് പിൻപറ്റി കൊണ്ടാവാം. എന്നാൽ അതു തുഹ്ഫക്ക് എതിരാണ്. ഇബ്നു ഹജർ(റ)വിൻ്റെ ഗ്രന്ഥങ്ങൾ പരസ്പരം എതിരായാൽ തുഹ്ഫ: യെയാണ് മുന്തിക്കേണ്ടത്.( ഇആനത്ത്: 2/386)

സ്ത്രീകൾക്ക് താടി മുളച്ചാൽ

സ്ത്രീകൾക്കു താടി മുളച്ചാൽ അത് നീക്കൽ സുന്നത്താണ്. പറിച്ചു കൊണ്ടോ വടിച്ചു കൊണ്ടോ നീക്കാം .കാരണം സ്ത്രീകൾക്ക് താടി എന്നത് അഭംഗിയാണ് (തുഹ്ഫ: 1/205)

`يسن للمرأة نتف اللحية أو حلقها لأنها مثلة في حقها` [ تحفة : ١ / ٢٠٥ ]

താടി വടിക്കാതെ തിരുസുന്നത്ത് പിൻപറ്റാൻ നാഥൻ നമുക്ക് തൗഫീഖ് നൽകട്ടെ.

ദുആ വസ്വിയ്യത്തോടെ
എം.എ.ജലീൽ സഖാഫി പുല്ലാര