വസ്വിയ്യത്ത് എന്നാലെന്ത്?
മരണാനന്തര കാലത്തേക്ക് ചേർത്തിക്കൊണ്ട് ഒരവകാശത്തെ മറ്റൊരാൾക്ക് ദാനം ചെയ്യലാണ് വസ്വിയ്യത്ത് (ഇആനത്ത്: 3/321)
വസ്വിയ്യത്തിനു എത്ര ഫർളുകളുണ്ട്?
നാല് വസ്വിയ്യത്ത് ചെയ്യുന്നവൻ, വസ്വിയ്യത്ത് ചെയ്യപ്പെട്ടവൻ, വസ്വിയ്യത്തിന്റെ വസ്തു, വാചകം എന്നിവയാണത് (ഇആനത്ത്: 3/320)
വസ്വിയ്യത്തിന്റെ വിധി?
ഉണ്ട് ചില സന്ദർഭങ്ങളിൽ വസ്വിയ്യത്ത് ചെയ്യൽ അനുവദനീയമാകും (മുബാഹ്) മുതലാളിക്ക് വസ്വിയ്യത്തു ചെയ്യുംപോലെ (ഇആനത്ത്: 3/320)
വസ്വിയ്യത്ത് ചെയ്യാൻ നേർച്ചയാക്കിയാലോ?
അപ്പോൾ വസ്വിയ്യത്ത് നിർബന്ധമാകും (ഇആനത്ത്: 3/320)
വസ്വിയ്യത്ത് വസ്തു സ്വീകരിക്കുന്നവർ തെറ്റായ മാർഗത്തിൽ ചെലവഴിക്കുമെന്നറിഞ്ഞാലോ?
പ്രസ്തുത വേളയിൽ വസ്വിയ്യത്ത് നിഷിദ്ധമാണ് (ഇആനത്ത്: 3/320)
വസ്വിയ്യത്തിൽ കറാഹത്ത് എന്ന വിധിയുണ്ടോ?
ഉണ്ട്, അനന്തരാവകാശികൾക്ക് സമ്പത്ത് വിലക്കുകയെന്ന ഉദ്ദേശ്യം കൂടാതെ മൂന്നിലൊന്നിനേക്കാൾ വസ്വിയ്യത്ത് ചെയ്യൽ കറാഹത്താണ് അവർക്കു അവകാശം തടയുകയെന്ന ഉദ്ദേശ്യം ഉണ്ടെങ്കിൽ മൂന്നിൽ ഒന്നിനേക്കാൾ വസ്വിയ്യത്ത് ഹറാമാകും (ഇആനത്ത്: 3/321)
ജീവിതകാലത്ത് സ്വദഖഃ ചെയ്യലോ വസ്വിയ്യത്തോ കൂടുതൽ പുണ്യം?
സ്വദഃഖ ചെയ്യൽ (ഇആനത്ത്: 3/321)
ആരിൽനിന്നാണു വസ്വിയ്യത്ത് സ്വീകാര്യമാവുക?
പ്രായപൂർത്തിയും ബുദ്ധിയുമുള്ള സ്വതന്ത്രനായ ഭീഷണിക്ക് വിധേയനാവാത്ത വ്യക്തിയിൽനിന്ന് (ഇആനത്ത്: 3/322)
തെറ്റായ കാര്യത്തിനുള്ള വസ്വിയ്യത്തോ?
അതു ഹറാമാണ് മാത്രമല്ല, വസ്വിയ്യത്ത് സാധുവാകുന്നതുമല്ല (ഇആനത്ത്: 3/326)
പള്ളി പരിപാലനത്തിനു വസ്വിയ്യത്താകുമ്പോൾ വാചകം?
വസ്വിയ്യത്തു ചെയ്യുന്നവൻ أَوْصَيْتُ بِهِ لِلْمَسْجِدِ (ഇതു ഞാൻ പള്ളിക്കുവേണ്ടി വസ്വിയ്യത്തു ചെയ്തു) എന്നു പറഞ്ഞാൽ മതി (ഫത്ഹുൽ മുഈൻ, പേജ്: 322)
നിർമിക്കാനിരിക്കുന്ന പള്ളിക്കുവേണ്ടി വസ്വിയ്യത്ത് സാധുവാകുമോ?
ഇല്ല അതു സ്വഹീഹാവില്ല അതേസമയം ഇപ്പോൾ ഉള്ള പള്ളിക്കും ഇനി ഉണ്ടാക്കാൻ പോകുന്ന പള്ളിക്കും വേണ്ടി വസ്വിയ്യത്തു ചെയ്തുവെന്നു പറഞ്ഞാൽ സ്വഹീഹാകും (ഇആനത്ത്: 3/235)
അവകാശികൾക്കു വസ്വിയ്യത്ത് ചെയ്യാമോ?
ചെയ്യാം വസ്വിയ്യത്ത് ചെയ്തവൻ മരിച്ചശേഷം മറ്റു അവകാശികളുടെ സമ്മതമുണ്ടെങ്കിൽ അതു സാധുവാകും അല്ലെങ്കിൽ സാധുവാകില്ല (ഇആനത്ത്: 3/328)
എഴുത്തു മുഖേന വസ്വിയ്യത്ത് ചെയ്യാമോ?
അതേ, നിയ്യത്തോടുകൂടെ എഴുതിയാലും മതി (ഇആനത്ത്: 3/333)
വസ്വിയ്യത്തിൽ 'ഞാൻ സ്വീകരിച്ചു 'വെന്നു പറയണോ?
ഒരു നിർണിത വ്യക്തിക്ക് വസ്വിയ്യത്ത് ചെയ്യുമ്പോൾ അവന്റെ 'ഖബൂൽ' (സ്വീകരിക്കൽ) നിർബന്ധമാണ് എങ്കിലേ വസ്വിയ്യത്ത് സ്വഹീഹാകൂ (ഇആനത്ത്: 3/333)
സമ്പത്തിന്റെ മുന്നിൽ ഒന്നിനേക്കാൾ വസ്വിയ്യത്ത് സാധുവാകുമോ?
അവകാശി സമ്മതിച്ചാൽ സ്വഹീഹാകും അല്ലെങ്കിൽ സ്വഹീഹല്ല (ഇആനത്ത്: 3/336)
ചില അവകാശികൾ സമ്മതിച്ചാലോ?
പ്രസ്തുത വേളയിൽ അവരുടെ ഓഹരിയിൽ നിന്നു മാത്രം മൂന്നിലൊന്നിനേക്കാൾ കൂടുതൽ ഉള്ളതിൽ സ്വഹീഹാകും (ഇആനത്ത്: 3/336)
സമ്പത്തിന്റെ മൂന്നിൽ ഒന്നിനേക്കാൾ കൂടുതൽ വസ്വിയ്യത്ത് ചെയ്യുന്നതിൽ ആരോഗ്യ സമയം, മരണ രോഗം എന്ന അന്തരമുണ്ടോ?
ഇല്ല രണ്ടുവേളയിലും ഒരേ വിധിതന്നെ (ഇആനത്ത്: 3/336)
വസ്വിയ്യത്തു ചെയ്തവനു അതിൽനിന്നു മടങ്ങാമോ?
അതേ, ഞാൻ വസ്വിയ്യത്തിനെ ബാത്വിലാക്കി എന്നോ, അതു പോലെയുള്ളതോ പറഞ്ഞാൽ മതി (ഇആനത്ത്: 3/347)
ജീവിതകാലത്ത് ഒരാൾ തന്റെ സമ്പത്ത് മുഴുവനും ആർക്കെങ്കിലും കൊടുക്കുന്നതിനു തെറ്റുണ്ടോ?
ഇല്ല കാരണം, അതു വസ്വിയ്യത്തല്ലല്ലോ ജീവിതകാലത്തു തന്നെ അധികാരപ്പെടുത്തിക്കൊടുക്കുകയാണല്ലോ
വഖ്ഫ് സ്വത്ത് ഏതെങ്കിലും ഘട്ടത്തിൽ വിൽക്കാമോ?
പറ്റില്ല ഇതാണു ശാഫിഈ മദ്ഹബ് (ഫത്ഹുൽ മുഈൻ)
യതീം എന്നതിന്റെ പരിധിയെത്ര?
പ്രായപൂർത്തിയാവുന്നതുവരെ (തുഹ്ഫ: 7/133)
ദർസിലേക്കു വഖ്ഫ് ചെയ്യപ്പെട്ടത് മറ്റു സ്ഥാപനത്തിലേക്കു തിരിക്കാമോ?
തിരിക്കാവതല്ല
വഖ്ഫ് ചെയ്യപ്പെട്ട ഖബ്ർസ്ഥാൻ റോഡുണ്ടാക്കാൻ വിട്ടുകൊടുക്കാമോ?
പാടില്ല ഖബ്ർ ഉണ്ടെങ്കിലും ഇല്ലെങ്കിലും പാടില്ല
വഖ്ഫ് ചെയ്യപ്പെട്ട ഖബ്ർസ്ഥാനിൽ മദ്റസ ഉണ്ടാക്കാമോ?
ഉണ്ടാക്കാവതല്ല
മൗലിദ് പരിപാടിയിലേക്ക് നേർച്ചയാക്കിയത് പള്ളി ആവശ്യത്തിലേക്കു തിരിക്കാമോ?
ഏതൊന്നിനു നേർച്ചയാക്കിയോ അതിന്റെ സംഖ്യ അതിലേക്കു മാത്രമേ തിരിക്കാവൂ
മുദർരിസുമാരുടെ ഒഴിവുകാല ശമ്പളം കട്ടു ചെയ്യാമോ?
പതിവനുസരിച്ചുള്ള ഒഴിവുകാല ശമ്പളം കട്ട് ചെയ്യാൻ പാടില്ല (ഫതാഫ റംലി: 3/54)
വഖ്ഫ് ചെയ്യപ്പെട്ട ഭൂമിയിൽ ഖബ്ർ പരിധിക്കപ്പുറം വിശാലമാക്കാമോ?
പാടില്ല (ജമൽ: 2/195)
No comments:
Post a Comment