ബാങ്ക് അക്കൗണ്ട് ആധാറുമായി എങ്ങനെ ഓൺലൈൻ വഴി ലിങ്ക് ചെയ്യാം ?

ആധാർ കാർഡ് ജീവിതത്തിൻ്റെ ഭാഗമായി മാറിയിരിക്കുകയാണ്. ആദ്യം പാൻ കാർഡ് ആധാർ കാർഡുമായി ബന്ധിപ്പിക്കാൻ ആയിരുന്നു നിർദ്ദേശം. ബാങ്ക് അക്കൗണ്ട്, മൊബൈൽ നമ്പർ തുടങ്ങി ജീവിതവുമായി ബന്ധപ്പെട്ടതെല്ലാം ആധാറുമായി ബന്ധിപ്പിക്കണമെന്ന് കർശന നിർദ്ദേശം വന്നിരിക്കുകയാണ്. എന്നാൽ, പലർക്കും ഇതിനെക്കുറിച്ച് ഒരു ധാരണ ഇല്ലാത്തതാണ് പ്രശ്നം.

ബാങ്ക് അക്കൗണ്ട് എങ്ങനെ ആധാർ കാർഡുമായി ബന്ധിപ്പിക്കാം ? ഓൺലെൻ ആയും എസ് എം എസിലൂടെയും എ ടി എമ്മിലൂടെയും ആധാർ കാർഡുമായി ബാങ്ക് അക്കൗണ്ട് ലിങ്ക് ചെയ്യാം. ബാങ്കിൻ്റെ ബ്രാഞ്ചിൽ പോകാതെ എങ്ങനെയൊക്കെ ബാങ്ക് അക്കൗണ്ട് ആധാർ കാർഡുമായി ബന്ധിപ്പിക്കാമെന്ന് നോക്കാം .

1. നിങ്ങൾ ഏത് ബാങ്കിൻ്റെ സേവനമാണോ ഉപയോഗിക്കുന്നത്, അതിൻ്റെ ഇൻ്റർനെറ്റ് ബാങ്കിങ്ങിൽ ലോഗിൻ ചെയ്യുക

2. ലോഗിൻ ചെയ്ത പേജിൽ ‘അപ്ഡേറ്റ് ആധാർ കാർഡ് ഡീറ്റയിൽസ്’ അല്ലെങ്കിൽ ‘ആധാർ കാർഡ് സീഡിങ്’ എന്നൊരു ഓപ്ഷൻ കാണും. അതിൽ ക്ലിക്ക് ചെയ്യുക. ക്ലിക്ക് ചെയ്യുമ്പോൾ വേറൊരു പേജിലേക്ക് പോകും.

3. അതിൽ ആധാർ കാർഡ് നമ്പർ ആവശ്യപ്പെട്ടിരിക്കുന്ന സ്ഥലത്ത് അത് എൻ്റർ ചെയ്ത് സബ്മിറ്റ് ചെയ്യുക.

4. ബാങ്കിൽ നമ്മൾ രജിസ്റ്റർ ചെയ്തിരിക്കുന്ന മൊബൈൽ നമ്പറിൻ്റെ അവസാന അക്കങ്ങൾ അപ്പോൾ കാണിക്കും. ആ നമ്പറിലേക്ക് ആധാർ ബാങ്ക് അക്കൗണ്ടുമായി രജിസ്റ്റർ ചെയ്തതിൻ്റെ മെസേജ് വരുന്നത് ആയിരിക്കും.

എസ് എം എസിലൂടെ എങ്ങനെ ബാങ്ക് അക്കൗണ്ട് ആധാറുമായി ബന്ധിപ്പിക്കാം

1. നിങ്ങളുടെ മൊബെൽ നമ്പർ അക്കൗണ്ടുള്ള ബാങ്കിൽ രജിസ്റ്റർ ചെയ്തിട്ടുണ്ടെങ്കിൽ എസ് എം എസിലൂടെ ബാങ്ക് അക്കൗണ്ട് ആധാറുമായി ബന്ധിപ്പിക്കാം.

2. ഉദാഹരണത്തിന് നിങ്ങൾ ഒരു എസ് ബി ഐ ഉപഭോക്താവ് ആണെങ്കിൽ 567676 എന്ന നമ്പറിലേക്ക് എസ് എം എസ് ചെയ്യുക. അതിൻ്റെ ഫോർമാറ്റ് ഇങ്ങനെയാണ് – UID(space)ആധാർനമ്പർ(space)അക്കൗണ്ട് നമ്പർ.

3. മൊബൈൽ നമ്പർ രജിസ്റ്റർ ചെയ്തിട്ടില്ലെങ്കിലോ ആധാർ അക്കൗണ്ടുമായി നേരത്തെ തന്നെ ലിങ്ക് ചെയ്തിട്ടുണ്ടെങ്കിലോ മറുപടിയായി എസ് എം എസ് ലഭിക്കും.

4. മൊബൈൽ നമ്പർ ആധാറുമായി രജിസ്റ്റർ ചെയ്തിട്ടുണ്ടെങ്കിൽ കൺഫർമേഷൻ എസ് എം എസ് ലഭിക്കും.

5.ബാങ്കിൻ്റെ കസ്റ്റമർ ഹെൽപ് ലൈനിൽ വിളിച്ച് ആധാർ എസ് എം എസ് മുഖേന അക്കൗണ്ടുമായി ബന്ധിപ്പിക്കുമോ എന്ന് ആദ്യമേ ഒന്ന് അന്വേഷിക്കാവുന്നതാണ്.

എ ടി എം മുഖേന എങ്ങനെയാണ് ബാങ്ക് അക്കൗണ്ട് ആധാർ കാർഡുമായി ബന്ധിപ്പിക്കുക

1. എസ് ബി ഐ ആണ് ഈ സേവനം നൽകുന്നത്

2. എ ടി എം കാർഡ് സ്വൈപ് ചെയ്ത്, പിൻ രേഖപ്പെടുത്തിയതിനു ശേഷം മെനു തെരഞ്ഞെടുക്കുക. അതിൽ, സർവീസ് – രജിസ്ട്രേഷൻസ് തെരഞ്ഞെടുക്കുക.

3. ഇതിൽ, ആധാർ രജിസ്ട്രേഷൻ തെരഞ്ഞെടുക്കുക. നിർദ്ദേശങ്ങൾ കൃത്യമായി പാലിക്കുക.