കണക്കു നോക്കലും മന്ത്രവും .

ചില മൗലവിമാർ രോഗങ്ങളും മറ്റും കണക്കു നോക്കി പറയുകയും പരിഹാരമാർഗ്ഗമെന്നോണം ഭക്ഷ്യ വസ്തുക്കളിലും മറ്റും അറബിലിപിയിൽ പലതും എഴുതുകയും മന്ത്രിക്കുകയുമൊക്കെ ചെയ്യുന്നു. പല കാര്യത്തിനും ഇന്നും ധാരാളംപേർ ഇവരെ സമീപിക്കുന്നു. യഥാർത്ഥത്തിൽ മതപരമായി ഈ പ്രവൃത്തികളെ എങ്ങനെ വിലയിരുത്താം.?

ചില ' കണക്കുകൾ' ജയിലിലടക്കപ്പെട്ടവരെ പുറത്തുകൊണ്ടുവരുക.ഗർഭസ്ഥ ശിശുവിനെ പുറംതള്ളുക പോലുള്ള ഗൗരവതരമായ സംഗതികൾക്കും ഉദ്ദേശ പൂർത്തീകരണത്തിനും ഉപകരിക്കുമെന്നും ശർഅ് അനുവദിക്കുന്ന കാര്യങ്ങൾക്ക് അതുപയോഗപ്പെടുത്താവുന്നതാണെന്നും ഇമാം ഇബ്നു ഹജർ ( റ) വ്യക്തമാക്കിയിട്ടുണ്ട്. ഫതാവൽ ഹദീസിയ്യ : പേജ് : 2
രോഗപരിഹാരങ്ങൾക്കും മറ്റുമായി ഇത്തരം കണക്കു നോക്കലുകൾ ഉപകരിക്കുമെന്നും മത വീക്ഷണത്തിൽ അവ അനുവദനീയമാണെന്നും ഇതു കൊണ്ടു വ്യക്തമായല്ലോ. ഖുർആൻ ആയത്തുകൾ കൊണ്ടും ദിക്ർ കൊണ്ടും മന്ത്രിക്കൽ അനുവദനീയം മാത്രമല്ല, സുന്നത്താണെന്ന് ഇമാം നവവി ( റ) പ്രസ്താവിച്ചിട്ടുണ്ട്. ( ശർഹു മുസ്ലിം 2 - 219)

ഖുർആനിൽ നിന്നു പ്രത്യേകം ഹിർസുകൾ ( കാവലിനുള്ള ഏലസ്സുകളും ഉറുക്കുകളും മറ്റും ) എഴുതലും മെഴുകിലോ കൂട്ടിലോ ആക്കി ശരീരത്തിൽ കെട്ടലും കറാഹത്തു പോലുമില്ലാതെ അനുവദനീയമാണ്. ( ശർവാനി : 1 - 149 )

ആകയാൽ മതപരമായി അനുവദനീയവും പുണ്യവുമായി വിലയിരുത്തപ്പെടാവുന്ന സംഗതികളാണ് താങ്കൾ ഉന്നയിച്ച കാര്യങ്ങൾ. അതിനു യോഗ്യരായ ആളുകളെ സമീപിക്കുന്നതിൽ യാതൊരു വിലക്കും അപാകതയുമില്ല.

( മൗലാന നജീബുസ്താദിന്റെ പ്രശ്നോത്തരം , രണ്ടാം ഭാഗം , പേജ് : 38 ).