പമ്പേഴ്സ് ധരിച്ച കുട്ടി പിടിച്ചാൽ ഉമ്മയുടെ നിസ്കാരം ബാത്വിലാകുമോ

 

നജസുള്ള പമ്പേഴ്സ് ധരിച്ച കുട്ടി നിസ്കരിക്കുന്നവന്റെ വസ്ത്രത്തിലോ ശരീരത്തിലോ പിടിച്ചാൽ നിസ്കാരം ബാത്വിലാകുമോ? 

നജസുള്ള പമ്പേഴ്സ് ധരിച്ച കുട്ടി ആൺകുട്ടിയായാലും പെൺകുട്ടിയായാലും ആ കുട്ടി നിസ്കരിക്കുന്നവനെ പിടിച്ചാൽ നിസ്കാരം ബാത്വിലാകും. നിസ്കരിക്കുന്നവൻ പ്രസ്തുത കുട്ടിയെ പിടിച്ചാലും നിസ്കാരം ബാത്വിലാകും.

ഇമാം നവവി(റ) :-പ്രസ്താവിക്കുന്നു: കല്ലുകൊണ്ട് ശൗച്യം ചെയ്തവനെ നിസ്കാരത്തിൽ ചുമന്നാൽ നിസ്കാരം ബാത്വിലാകുന്നതാണ്. [ മിൻഹാജ് , തുഹ്ഫ: ശർവാനി:2/128,129]   

ഇമാം ഖൽയൂബി (റ) വിവരിക്കുന്നു: നിസ്കരിക്കുന്നവൻ അവൻ്റെ കൈയ്യിലോ വസ്ത്രത്തിലോ പിടിച്ചാലും നിസ്കരിക്കുന്നവനെ അവൻ പിടിച്ചാലും നിസ്കാരം ബാത്വിലാകുന്നതാണ്. - ശരീരത്തിലോ വസ്ത്രത്തിലോ നജസുള്ള കുട്ടിയുടെ മസ്അലയും ഇങ്ങനെ തന്നെ - ആ കുട്ടി നിസ്കരിക്കുന്നവനെ പിടിച്ചാലും നിസ്കരിക്കുന്നവൻ ആ കുട്ടിയെ പിടിച്ചാലും (കേവലം തൊട്ടാലല്ല ) നിസ്കാരം ബാത്വിലാകും[ ഖൽയൂബി: 1/208 നോക്കുക)

 (ﻭﻟﻮ ﺣﻤﻞ ﻣﺴﺘﺠﻤﺮا) ﻓﻲ اﻟﺼﻼﺓ (ﺑﻄﻠﺖ ﻓﻲ اﻷﺻﺢ) [ منهاج ]

 ﻭﻛﺬا ﻟﻮ ﺣﻤﻞ ﺣﺎﻣﻠﻪ ﻭﻛﺎلحمل اﻟﻘﺎﺑﺾ ﻋﻠﻰ ﺛﻮﺑﻪ ﺃﻭ ﻳﺪﻩ ﺃﻭ ﻋﻜﺴﻪ ﻭﻛﺎﻟﻤﺴﺘﺠﻤﺮ ﻛﻞ ﺫﻱ ﻧﺠﺎﺳﺔ [ حاشية القليوبي : 1/208 ]

`നിസ്കരിച്ചു കൊണ്ടിരിക്കുന്ന ഉമ്മയെ പമ്പേഴ്സ് ധരിച്ച കുട്ടി വന്നു പിടിച്ചാൽ ആ പമ്പേഴ്സിൽ നജസുണ്ടോ ഇല്ലയോ എന്നു ഉറപ്പ് വരുത്തേണം. നജസുണ്ടെങ്കിൽ നിസ്കാരം ബാത്വിലാകും സാധാരണ സംഭവിക്കുന്ന കാര്യമായതുകൊണ്ടാണ് ഇക്കാര്യം പ്രത്യേകം എഴുതിയത്`. 

ദുആ വസ്വിയ്യത്തോടെ
എം.എ.ജലീൽ സഖാഫി പുല്ലാര